በትግራይ ክልል ከተሞች ከተለጠፉ ማስታወቂያዎች 27 በመቶ ብቻ በትግርኛ ቋንቋ ተጽፈዋል

በመቀሌ ከተማ “ያልተስተካከለ የትግርኛ ቋንቋ አጠቃቀም” በሚል ርዕስ ዛሬ ለግማሽ ቀን በተዘጋጀው የውይይት መድረክ ላይ በከተማው ንግድና ኢንዱስትሪ ፅሕፈት ቤት የአገር በቀል ባህላዊ ዕውቀት ጥናት ማስታወቂያ ዋና የሥራ ሂደት ባለቤት አቶ ብርሃኑ ወልደሚካኤል ባቀረቡት ጥናታዊ ጽሑፍ ፤ በክልሉ የተለያዩ ከተሞች ከተጠኑ 1ሺ157 ማስታወቂያዎች ውስጥ 308 ማስታወቂያዎች ብቻ በትግርኛ ቋንቋ መጻፋቸው ተረጋግጧል።

አንዳንድ የንግድ ድርጅቶች ማስታወቂያቸውን ለምን በትግርኛ ቋንቋ እንዳልጻፉ ተጠይቀውም በማንኛውም ቋንቋ ቢጻፍ ምን ችግር አለው የሚል አስገራሚ መልስ ማግኘታቸውን አስረድተዋል ።

ይህም የትግራይን ህዝብ በቋንቋው የመጻፍና የመግለጽ ህገ መንግሥታዊ መብቱን የሚጥስ በመሆኑ የቋንቋውን ደህንነት ለመጠበቅ በሚደረገው ጥረት ሁሉም መረባረብ እንደሚገባው አቶ ብርሃኑ ጠቁመዋል ።

ከክልሉ መንግሥት፣ከመቀሌ ዩኒቨርሲቲ፣ከሚዲያዎችና ከሌሎችም የሚመለከታቸው አካላት የተውጣጡ ተሳታፊዎች ቋንቋውን ለማጎልበት የሚቻላቸውን ሁሉ እንደሚያደርጉ መግለጻቸውን ዋልታ ኢንፎርሜሽን ማዕከል ዘግቧል።