Logo

የፓርቲዎች ድርድር ተጠናቀቀ

October 28, 2009

ተደራዳሪ ፓርቲዎቹ፣ “የፖለቲካ ፓርቲዎች የስነ ምግባር ደንብ” እና “የፖለቲካ ፓርቲዎች የስነ ምግባር ደንብ ማስፈጸሚያ ስልት” የሚሉ ሁለት ሰነዶችን በጋራ ስምምነት ያጸደቁ ሲሆን፤ እነዚህ ሰነዶች በሀገሪቱ ፓርላማ በኩል በአዋጅ እንዲወጡና የሀገሪቱ የምርጫ ህጎች አካል እንዲሆኑ መስማማታቸውንም የዜና ምንጩ አስታውቋል፡፡

ድርድሩ የለጋሽ ሀገራት አምባሳደሮች ተወካዮች በታዛቢነት በተገኙበት፣ ከእያንዳንዱ ተደራዳሪ ፓርቲ አራት አራት አባላት የተወከሉበትና በሳምንት በአማካይ ለአራት ቀናት ያህል ይካሄድ እንደነበር የዜና ምንጩ አስታውሶ፤ ከላይ በተጠቀሱት ሁለት ሰነዶች ላይ የተደረገው ድርድር በጥቅምት ወር መጀመሪያ አካባቢ መጠናቀቁንና እስከ ትናንት (ማክሰኞ ዕለት) ድረስ የተደረገው ውይይት ስለቀጣይ አጀንዳዎች፣ የድርድሩ ውጤት ስለሚገለጽበት ሁኔታ፣ ስለፊርማው ስነ ስርዓትና በፊርማው ስነ ስርዓት ላይ ስለሚቀርቡ ሰነዶች እንደነበር የዜና ምንጩ ጨምሮ ገልጿል፡፡

ድርድሩ በመግባባት መንፈስና በሰጥቶ መቀበል መርህ የተካሄደ ቢሆንም፤ ድርድሩ ከተጠናቀቀ በኋላ አንዳንድ ፓርቲዎች በውጭ ባሉ ደጋፊዎቻቸው የሚሰነዘርባቸውን ጫና መቋቋም ስላልቻሉ በድርድሩ አጀንዳ ውስጥ ያልነበሩና ውይይት ያልተደረገባቸውን አዳዲስ ሃሳቦችን በየዕለቱ ይዘው በመምጣት በሰነዱ ላይ ላለመፈረምና ድርድሩን ለማቋረጥ ያንገራግሩ እንደነበር ለድርድሩ ቅርበት ያላቸውን ወገኖች ዋቢ ያደረገው ይኸው የዜና ምንጫችን አስታውቋል፡፡ ይህም ሁኔታ ለሁለት ወራት በተደረገው ድርድር የተገኘውን ውጤት እስከ መበተን የደረሰ ስጋት ፈጥሮ እንደነበር ጨምሮ ገልጿል፡፡

ተደራዳሪ ፓርቲዎቹ ይህ የድርድር ውጤት ስለሚፈረምበት ስነ ስርዓትና ፊርማው በየፓርቲዎቹ በየትኞቹ ኃላፊዎች ይፈረም? በሚለው ላይ በዛሬው ዕለት ሃሳብ የተለዋወጡ ሲሆን፤ “ይህ ሰነድ በሀገሪቱ የፖለቲካ ፓርቲዎች ታሪክ የመጀመሪያውና ታሪካዊ በመሆኑ በሁሉም ፓርቲዎች መሪዎች ቢፈረም ይሻላል” የሚል መግባባት ላይ መድረሳቸውም ታውቋል፡፡

ይሁን እንጂ፣ “የኢህአዴግ ሊቀ መንበር የሆኑት ጠቅላይ ሚኒስትር መለስ ዜናዊ ከኢትዮጵያ ውጭ ስለሆኑ እርሳቸው ሀሙስ ዕለት ወደ ሀገር ቤት ተመልሰው በጉዳዩ ላይ እስከምናማክራቸው ድረስ ጊዜ ይሰጠን” የሚል ጥያቄ በኢህአዴግ በኩል ስለቀረበ ሀሙስ ዕለት ሊደረግ የነበረው የፊርማ ሥነ ሥርዓት ወደ ዓርብ ዕለት ከቀኑ 9፡00 ሰዓት ተሸጋግሯል ሲል የዜና ምንጫችን ገልጿል፡፡

Share

One comment on “የፓርቲዎች ድርድር ተጠናቀቀ

  1. Shame on MEDREK! MEDREK should have contributed its share on the election code of conduct. But walked out and pilled up nonsense justification which have no relevance to the country at large and to the party itself!

Comments are closed