Logo

መድረክ ሌላ ሰነድ አዘጋጅቻለሁ እያለ ነው፤ ይቅርታ ከጠየቀ ከሌሎቹ ፓርቲዎች ጋር ይሳተፋል

November 9, 2009

ለጉዳዩ ቅርበት ካላቸው ምንጮች በደረሰን መረጃ መሠረት፣ መድረክ በዚህ ስብሰባ ላይ እንደማይገኝና ይልቁንም አራቱ ፓርቲዎች ያዘጋጁት ዓይነት ሰነድ ማዘጋጀቱ ታውቋል። አራቱ ፓርቲዎች በበኩላቸው “መድረክ በሰኞው ስብሰባ ላይ ከተገኘ ምን እናድርግ” በሚል እጀንዳ ላይ ቅዳሜ ዕለት ባደረጉት ስብሰባ ተወያይተው፣ “በመድረክ ጉዳይ ላይ እኛ ብቻችንን መወሰን የለብንም። በዕለቱ የሚገኙት ፓርቲዎች ራሱ መድረክ ባለበት ተወያይተው ይወስኑ። መድረክ ባለፈው ጊዜ ስብሰባ ረግጦ ሄዶ አሁን እንዲመለስ ያደረገውን ምክንያት እንዲያስረዳና በቂ ምክንያት ማቅረብ ካልቻለ ይቅርታ ጠይቆና ለወደፊቱም ስብሰባ ረግጦ እንደማይሄድ አረጋግጦ መቀጠል ይችላል” የሚል ስምምነት ላይ መድረሳቸው ታውቋል። አራቱ ፓርቲዎች ባደረጉት ስብሰባ ላይ መድረክን አስመልክቶ ባደረጉት የሃሳብ ልውውጥ፤ መድረክ ከቀውስ ወደ ቀውስ እየተሸጋገረ መሆኑን ግንዛቤ መያዛቸውንና ይህ አካል ከሰላማዊ ሂደቱ እንዳያፈነግጥ በመቻቻል መንፈስ ሊታገሱት እንደሚገባ አቋም መያዛቸውን የዜና ምንጫችን አስታውቋል።

በተያያዘ ዜና፣ ሃምሳ ሦስቱ ፓርቲዎች ከአራቱ ፓርቲዎች ጋር ሰኞ ዕለት በሚያካሂዱት ስብሰባ በሰነዱ ላይ ውይይት የሚያደርጉ ሲሆን፤ እያንዳንዱ ፓርቲ አምስት አምስት ደቂቃ የመናገሪያ ጊዜ እንደሚኖራቸው ታውቋል። በአንድ ጊዜ ሦስት ፓርቲዎች ያላቸውን አስተያየት ካቀረቡ በኋላ በአራቱ ፓርቲዎች ማብራሪያ እየተሰጠ በእያንዳንዱ አንቀጽ ላይ ውይይቱ የሚካሄድ መሆኑን የዜና ምንጫችን ገልጿል። የስብሰባው ሂደት በድምጽና በምስል ተቀርፆ በስብሰባው ላይ ተካፋይ ለሆኑት ፖርቲዎች እንደሚሰጥና ስብሰባው ለጋዜጠኞች ዝግ እንደሆነ ታውቋል። ይሁን እንጂ፣ የስብሰባው ሂደት ከፓርቲዎቹ በተውጣጣ ኮሚቴ አማካይነት ለመገናኛ ብዙኃን ይገለፃል ተብሏል።

Share

One comment on “መድረክ ሌላ ሰነድ አዘጋጅቻለሁ እያለ ነው፤ ይቅርታ ከጠየቀ ከሌሎቹ ፓርቲዎች ጋር ይሳተፋል

  1. What will the future of Ethiopia unless God intervein in the issues of our country? I do not know what is happening now and will happen? But, God knows every thing going on.

Comments are closed