Logo

ዶ/ር ነጋሦ የአንድነት ፓርቲ ፕሬዝዳንት መሆናቸው ተነገረ

February 11, 2011

የአንድነት ፓርቲ ፕሬዝዳንት የነበሩት ወ/ሪት ብርቱካን ሚደቅሳ ለሁለተኛ ጊዜ እስር ቤት ከገቡበት ጊዜ ጀምሮ የምክትል ፕሬዝዳንትነት ኃላፊነት ይዘው ፓርቲውን በበላይነት ሲመሩ የነበሩት ኢ/ር ግዛቸው ሽፈራው ከኃላፊነታቸው እንዲነሱ ምክንያት የሆነው ድርጅቱ ያዘጋጀው የአምስት ዓመት ስትራቴጂክ እቅድ መሆኑንም የሪፖርተራችን ዘገባ አመልክቷል።

የአንድነት ፓርቲ ብሔራዊ ምክር ቤት ባለፈው ቅዳሜና እሑድ ባደረገው ስብሰባ የአምስት ዓመት እቅድና የስትራቴጂ ሰነድ ይፋ አድጓል። ይህ ሰነድ የተዘጋጀው በአቶ ስየ አብርሃ፣ በብቸኛው የፓርላማ አባል በአቶ ግርማ ሰይፉና በአቶ ዳዊት አማረ መሆኑ ታውቋል። እነዚህ አባላት የተመረጡት በፓርቲው ብሔራዊ ምክር ቤት ሲሆን፤ አርቅቀው ባቀረቡት የአምስት ዓመት  እቅድና የስትራቴጂ ሰነድ ላይ “የፓርቲው ፕሬዝዳንት የሚሆን ሰው የሙሉ ጊዜ ስራ የሚሰራ መሆን አለበት” የሚል ሃሳብ መስፈሩ ተገልጿል።

በተደጋጋሚ “ስልጣን ይወዳሉ” እየተባሉ ክስና ወቀሳ የሚቀርብባቸው ኢ/ር ግዛቸው ሽፈራው በዚሁ በፓርቲው የአምስት ዓመት  እቅድና ስትራቴጂ ሰነድ ላይ በሰፈረው ሃሳብ መሰረት ስልጣናቸውን የለቀቁ ሲሆን፣ የፓርቲው ጠቅላላ ጉባዔ እስከሚካሄድበት እስከ ሰኔ ወር 2003 ዓ.ም ድረስ ዶ/ር ነጋሦ ጊዳዳ ይህንን ኃላፊነት የተረከቡ መሆኑም ታውቋል።

ይህንን የአምስት ዓመት  እቅድና የስትራቴጂ ሰነድ የሚያረቀውን ኮሚቴ በበላይነት እንደመሩ የሚነገርላቸው አቶ ስየ አብርሃ ሰነዱን ለፓርቲው ብሔራዊ ምክር ቤት ባቀረቡበት ወቅት “ባረጀና ተደጋጋሚ በሆነ የትግል ስልት አንቀጥልም። አዲስ ስትራቴጂና እቅድ ያስፈልገናል። አዲስ አደረጃጀትና ህዝብን ማሳተፍ ያስፈልገናል። ወሬ ላይ ሳይሆን ተግባር ላይ ያተኮረ የትግል አቅጣጫ ያስፈልገናል” ማለታቸውም ታውቋል።

ሰነዱ ላይ በሰፈረው ሃሳብ መሰረት፣ ዶ/ር ነጋሦ ጊዳዳ እና ኢ/ር ግዛቸው ሽፈራው የስልጣን ቦታ ከመለዋወጣቸው በስተቀር በፓርቲው ውስጥ ሌላ የስልጣን ድልድል አለመደረጉን የኢትዮ ፋክት ሪፖርተር ዘገባ ገልፆ፣ ይህም የሆነው የቀድሞዋ ፕሬዝዳንት ወ/ሪት ብርቱካን ወደ ፓርቲው አለመመለሳቸው ከተረጋገጠ በኋላ መሆኑን ጨምሮ አስታውቋል።

በጉዳዩ ላይ የኢትዮ ፋክት ዘጋቢ ያነጋገራቸው አንዳንድ የፖለቲካ ታዛቢዎች፤ ፓርቲው የሚመራበትን እቅድና ስትራቴጂ ማዘጋጀቱን እና ኢ/ር ግዛቸው የወሰዱትን ከስልጣን የመልቀቅ አቋም አድንቀው “ቀረበ የተባለው የፓርቲው ሰነድ የተዘጋጀው በአቶ ስየ የበላይነት ነው። ሰነዱ ጸድቆ ውሎ ሳያድር ዶ/ር ነጋሦን የፓርቲው መሪ አደረገ። እነዚህ ሁለት ሰዎች ደግሞ የኢህአዴግ ከፍተኛ አመራር ነበሩ። ታዲያ ይህ ፓርቲ ወደፊት ኢህአዴግን እየመሰለ ላለመሄዱ ምን ዋስትና አለ? ወይም ደግሞ እነ አቶ ስየ ሰነዱን እነሱን በሚጠቅማቸው መንገድ አዘጋጅተው፣ ያባረሯቸውን ጓደኞቻቸውን ለመበቀል እየተዘጋጁ ላለመሆኑስ ማን ያውቃል?” በማለት ስጋታቸውን ገልጸዋል፡፡

Share

2 comments on “ዶ/ር ነጋሦ የአንድነት ፓርቲ ፕሬዝዳንት መሆናቸው ተነገረ

  1. Dr. Negasso once said “Amhara is a settler colonialist”. A man with this sentiment, how can he be president to multi-ethnic party. This is the death of the ANDINET paty. The other thing is Negasso is a communist. He resign from EPRDF because of ideological difference. Then, how could he be the leader of the “Liberal” ANDINET?

Comments are closed