Logo

የኢዴፓ ጠቅላላ ጉባዔ ነገ ይካሄዳል

March 21, 2011

እሑድ እለት ከጥዋቱ 2፡00 ሰዓት ጀምሮ በሚካሄደው በዚሁ የኢዴፓ ጠቅላላ ጉባዔ ላይ ከመላ ሀገሪቱ የሚወከሉ እስከ 250 የሚደርሱ የጉባዔ አባላት ተሳታፊ እንደሚሆኑ የሪፖርተራችን ዘገባ አመልክቷል።

የኢዴፓ ጠቅላላ ጉባዔ የሚነጋገርባቸው አጀንዳዎች፤ የፓርቲውን የሁለት ዓመታት እንቅስቃሴ የሚያሳዩ የማእከላዊ ኮሚቴን እና የኦዲትና ኢንስፔክሽን ኮሚቴን ሪፖርቶች አዳምጦ ውሳኔ ማሳለፍ፣ ለቀጣይ ሁለት ዓመታት ፓርቲውን የሚመሩ አባላትን መምረጥ፣ በፓርቲው ደንብና ፕሮግራም ላይ ማሻሻያ ማድረግ፣ ባለፉት 11 ሳምንታት የፓርቲው አባላት ሲወያዩባቸው በነበሩ አስር አጀንዳዎች ላይ መወያየትና በመጨረሻም የፓርቲውን ቀጣይ የትግል አቅጣጫ በሚያመላክቱ ጉዳዮች ዙሪያ የአቋም መግለጫ ማውጣት እንደሆነም ሪፖርተራችን ጨምሮ ገልጿል።

የኢዴፓ ጠቅላላ ጉባዔ የሚያሳልፋቸው ውሳኔዎችና አዲስ የሚመረጡት አመራሮች ለሕዝብ ይፋ የሚደረገው ሰኞ በ10፡30 ሰዓት በራስ ሆቴል በተዘጋጀው የመዝጊያ ስነ ስርዓት ላይ ሲሆን፣ በዚሁ ወቅት ፓርቲውን ላለፉት አራት ዓመታት በሊቀ መንበርነት የመሩት አቶ ልደቱ አያሌው የፓርቲ ስልጣናቸውን ለተተኪያቸው እንደሚያስረክቡ ይጠበቃል። አቶ ልደቱን፣ የፓርቲው ዋና ጸሐፊ አቶ ሙሼ ሰሙ ወይም የድርጅት ጉዳይ ኃላፊው አቶ መስፍን መንግስቱ እንደሚተኳቸውም ይገመታል ሲል የሪፖርተራችን ዘገባ አመልክቷል።

በመዝጊያ ስነ ስርዓቱ ላይ ጋዜጠኞች፣ ታዋቂ ግለሰቦች፣ የሀገር ሽማግሌዎች፣ የተለያዩ የፖለቲካ ፓርቲ ተወካዮች እንዲገኙ ጥሪ የተደረገላቸው ሲሆን፣ የኢዴፓ መስራችና ከፍተኛ አመራር አባል ሆነው ካገለገሉ በኋላ በራሳቸው ፈቃድ ከፓርቲው የተለዩት አቶ አብዱራህማን አህመዲን እና አሁን በአንድነት ፓርቲ ውስጥ “የመርህ ይከበር” ቡድን አባል የሆኑት አቶ ታምራት ታረቀኝ በመዝጊያ ስነ ስርዓቱ ላይ እንዲገኙ ጥሪ የተደረገላቸው መሆኑን ሪፖርተራችን ጨምሮ ገልጿል።

ለኢዴፓ አመራር ቅርበት ያላቸው የዜና ምንጮች ለኢትዮ-ፋክት ዘጋቢ እንደሰጡት መረጃ ከሆነ፣ የኢዴፓ ማእከላዊ ኮሚቴ ቁጥር ከ23 ወደ 25 እና የስራ አስፈጻሚ ኮሚቴው አባላት ቁጥር ደግሞ ከ7 ወደ 9 ከፍ እንደሚል፣ በፓርቲው የመተዳደሪያ ደንብ መሰረት ከቀድሞው የማእከላዊ ኮሚቴ አባላት ውስጥ 18ቱ አሁንም በእጩነት እንደሚቀርቡና ተጨማሪ 18 አባላት ከፓርቲው አባላት መካከል እንደሚጠቆሙ ለማወቅ ተችሏል።

Share

2 comments on “የኢዴፓ ጠቅላላ ጉባዔ ነገ ይካሄዳል

  1. ሙሼ ከአስራ ሁለት ዓመታት መራራ ትግል በኋላ የሊቀ መንበርነቷን ቦታ በድል ሊቀዳጅ ነው ማለት ነው? ጥሩ ነው፣ ሰው ከቆየ ከሚስቱ ይወልዳል ይባል የለ፡፡ ልደቱ ጋር ተፋጦ ተፋጦ በመጨረሻ ሊለቅለት ነው፡፡ ግን ሁለቱ ይቻቻሉ ይሆን? ሁሉንም ለጊዜ እንተወው!!!!

  2. ዳዊት ለምን ታወናብዳለህ? እስከ ምርጫ 97 ማለትም የዛሬ አምስት አመት ድረስ ዶር አድማሱ አልነበሩም ፕሬዚዳንት የነበሩት:: እንደሚመስልኝ ልደቱ ዴሞክራሲያዊ በሆነ መንገድ ፕሬዚዳንትነቱን መልቀቁ ነው ያናደደህ:: አይደል?

Comments are closed