Logo

መድረክ በሽብርተኝነት ስም ዜጎችን ማሰር እንዲቆም አሳሰበ

July 21, 2011

“ኢህአዴግ የኢትዮጵያን ሕዝብ እምነት ማጣቱን አውቆ፣ እርስ በእርሳቸው የሚጣረሱ የራሱ አባላት ስብስብ በሆነው ፓርላማ በየአንድ ቀን ውሎው እያሳወጀ ህዝቡን እንደምርኮ ይዞ በማስፈራራት መግዛቱን አማራጭ ብሎ ተያይዞታል” ያለው መግለጫው ከእነዚህ ነውጠኛ (Draconian) ህጎች መካከል ገሚሶቹ አንድን ወገን ታሳቢ ያደረጉና “ተለክተው የተሰፉ” ይገኙባቸዋል ሲል መግለጫው ጠቅሶ፣ የፀረ-ሽብርተኝነትና የሲቪል ማህበራት አዋጆች ተጠቃሽ ናቸው ብሏል ሲል የሪፖርተራችን ዘገባ አመልክቷል፡፡

ኢህአዴግ በዚህ መልኩ እየወሰዳቸው ባሉት እርምጃዎች ምክንያት በሀገሪቱ ሕገ መንግስት ለዜጎች የተሰጡትን የሲቪል ማህበረሰቦችን መስርቶ ከማንኛውም ወገን ሕጋዊ ድጋፍ አግኝቶ የመስራት እንቅስቃሴ ገትቷል፣ ሃሳብን በነጻነት የመግለጽም የግለሰብም ሆነ የፕሬስ ድርጅቶች መብት “ሽብር መንዛት“ በሚል ሰበብ እየታፈነ ነው ሲል መድረክ በሰጠው መግለጫ ማማረሩን ሪፖርተራችን የላከልን ዘገባ አስረድቷል፡፡

በቂ ማስረጃ ሳይያዝ ዜጎችን እያሰሩ ማሰቃየት እየተለመደ መምጣቱን የጠቀሰው የመድረክ መግለጫ፣ በዚህ ረገድ የመድረክ አባል የሆነው የኦሮሞ ፌዴራሊስት ዴሞክራሲያዊ ንቅናቄ የስራ አስፈጻሚ ኮሚቴ አባል የሆኑት አቶ ብርሃኑ እምሩ እና የዚሁ ድርጅት የማእከላዊ ኮሚቴ አባል የሆኑት አቶ መለሰ ጫላ እንዲሁም በምእራብ ሸዋ ነዋሪ የሆነውና በእስር ቤት በደረሰበት ግርፋት እና እንግልት የአእምሮ ህመምተኛ የሆነው የአቶ ግዛቸው አብዲሳ እና በደቡብ ጎንደር በወረታ ከተማ ነዋሪና የአንድነት ፓርቲ አባል በሆነው በአቶ ሙላት አበባው ላይ የደረሰው ድብደባ በእጅጉ ያሳስበናል ብሏል፡፡

ሃሰብን በነጻነት የመግለጽ መብት ህገ መንግስታዊ ጥበቃ ያለው ጉዳይ መሆኑ እየታወቀ፣ የፕሬስ አካላትን በኢንተርኔት የሚደረጉ ግንኙነቶች በሽብር ፈጣሪነት እያስፈረጀ መሆኑን የጠቆመው መግለጫው ይህም በደርግ ዘመን መንግስት የዚህን ወይም የዚያን ድርጅት በራሪ ወረቀት አንብባችኋል እያለ የሀገሪቱን ምስኪን ዜጎች ፍዳቸውን ያዩበትን የሰቆቃና የእስር ወቅት እንድናስታውስ የሚያደርግ ነው ሲል መድረክ በመግለጫው ማማረሩን ሪፖርተራችን ዘግቧል፡፡

Share