Logo

የተደበቁ በድርቅ የተጠቁ አካባቢዎች ይፋ ሆነው የነፍስ አድን እርዳታ እንዲደረግ መድረክ ጠየቀ

August 14, 2011

በእነዚሁ የተደበቁ አካባቢዎች ያሉ ዜጎች ሕይወት እንደ ቅጠል ከመርገፉ በፊት ረሃቡ የተከሰተባቸው አካባቢዎች ይፋ ወጥተው አስቸኳይ የነፍስ አድን እርዳታ የሚያገኙበት ሁኔታ ትኩረት እንዲሰጠው መድረክ ዓርብ እለት ባወጣው መግለጫ መጠየቁን ሪፖርተራችን ከአዲስ አበባ የላከልን ዘገባ አመልክቷል።

ኢህአዴግ ሥልጣን ከያዘ ከአስር ዓመታት በኋላ በ1994 ዓ.ም በኢትዮጵያ ታሪክ ለመጀመሪያ ጊዜ 14 ሚሊዮን ሕዝብ ለከፍተኛ ርሃብ የተጋለጠበት ሁኔታ እንደነበር መድረክ አስታውሶ፣ በዚህም ምክንያት ኢትዮጵያውያን በየደረሱበት አንገታቸውን የደፉበት አሳፋሪና አሳዛኝ ወቅት ተከስቶ ነበር ሲል ጨምሮ ገልጿል።

የመድረክ መግለጫ አያይዞም፣ አሁንም እንደገና ከአስር ዓመታት በኋላ አገዛዙ የረሃብተኛውን ቁጥር አንዴ 2.8 ሚሊዮን፣ ሌላ ጊዜ 3.2 ሚሊዮን፣ ከዚያም 4.5 ሚሊዮን ነው በማለት ሲዋዥቅ ከቆየ በኋላ፤ አሁን በቅርቡ ደግሞ 7.8 ሚሊዮን ዜጎች ራሳቸውን መደገፍ የማይችሉ በሴፍቲኔት የታቀፉ እንደሆኑ ይፋ ለማድረግ መገደዱን የመድረክ መግለጫ ያብራራል።

 መድረክ ዓርብ እለት ባወጣው በዚሁ መግለጫው ላይ እንደሚለው፣ በአሁኑ ወቅት ከፍተኛ በሆነ ድርቅና ርሃብ ከተመቱት አካባቢዎች ውስጥ የኢትዮጵያ ሶማሌ ክልል፣ በርካታ የኦሮሚያ ዞኖች፣ ቦረና፣ ጉጂ፣ አርሲ፣ ምእራብ አርሲና ባሌ፣ ምእራብ ሐረርጌ፣ ምስራቅ ሐረርጌ፣ የምእራብ ሸዋ ቆላማ ወረዳዎች የታወቁ እንደሆነና በደቡብ የኢትዮጵያ ክፍል በደቡብ ኦሞ፣ በወላይታ፣ በከንባታና ጠንባሮ፣ በሐዲያ ዞኖችና በቡርጂና አማሮ እንዲሁም በሌሎች ልዩ ወረዳዎች በዝናብ ዘግይቶ መምጣትና ቶሎ ማቋረጥ ምክንያት የተከሰተው “አረንጓዴ ርሃብ” ከኢትዮጵያና ከዓለም ሕዝብ እይታ ተደብቆ የተያዘ ነው ሲል ሪፖርተራችን የመድረክን መግለጫ ጠቅሶ የላከልን ዘገባ አመልክቷል።

በደቡብ የሀገሪቱ አካባቢዎች እርዳታ የሚያስፈልገው ሕዝብ ቁጥር 785 ሺህ እንደሚደርስ መድረክ በሰጠው መግለጫ አስታውቆ፣ ይሁን እንጂ መንግስት ይህንን ቁጥር ወደ 280 ሺህ ዝቅ አድርጎ እንደሚገልጸው ያብራራል። በዚህም ምክንያት የሕዝቡን እርዳታ የማግኘት እድል የዘጋ አሳዛኝ ተግባር ነው በማለት መድረክ ያደረበትን ስጋት ገልጿል ሲል ሪፖርተራችን የላከልን ዘገባ አስታውቋል።

በመሆኑም፣ መንግስት የችግሩን ስፋት፣ ጥልቀትና አሳሳቢነት ያለ ምንም ማድበስበስ ለኢትዮጵያ ሕዝብና ለዓለም አቀፍ ማህበረሰብ ይፋ በማድረግ የነፍስ አድን እርዳታ በስፋት እንዲጠይቅ መድረክ በሰጠው መግለጫ አሳስባል፡፡ ከዚሁ ጋር በማያያዝም፣ በሀገሪቱ ያሉ መንግስታዊ፣ ሕዝባዊና የግል ድርጅቶች ሁሉ ለዚህ የነፍስ አድን እርዳታ ጉዳይ ተገቢውን ትኩረት ሰጥተው እንዲንቀሳቀሱና በመንግስትም በኩል ተገቢው መንግስታዊ እርምጃ እንዲወሰድ መድረክ ባወጣው መግለጫ ጠይቋል ሲል ሪፖርተራችን የላከልን ዘገባ አመልክቷል።

Share