Logo

ኢዴፓ ያላጣራሁት ቢሆንም የጉራፈርዳ ነዋሪዎችን መፈናቀል አወግዛለሁ አለ

April 18, 2012

መንግሥት በራሱ ከፍተኛ ባለሥልጣናት አማካይነት በዜጎች ላይ የተፈጸመው ኢ-ሕገ መንግሥታዊ ድርጊት በነፃና ገለልተኛ ወገን ተጣርቶ ትክክለኛ መረጃ ለሕዝቡ እንዲያቀርብ የጠየቀው ኢዴፓ፣ የመብት ጥሰት የፈጸሙ በሕግ እንዲጠየቁ በማድረግ የዜጎችን ሕገ መንግሥታዊ መብት የማክበርና የማስከበር ኃላፊነቱን መወጣትና ለሕዝብ ያለውን ተጠያቂነት ማረጋገጥ እንዳለበት አሳስቧል፡፡

በሕገ መንግሥቱ አንቀጽ 32 ለኢትዮጵያውያን ብቻ ሳይሆን በኢትዮጵያ በሕጋዊ መንገድ ተመዝግበው ለሚኖሩ የውጭ አገር ሰዎች ጭምር፣ በየትኛውም የአገሪቱ ክፍል የመኖር፣ ሀብት የማፍራትና ንብረት የማፍራት መብት መስጠቱን ኢዴፓ ጠቁሟል፡፡ በጉራፈርዳ ወረዳ ይኖሩ የነበሩት ዜጎች ቀደም ብለው ይኖሩ በነበሩ ነዋሪዎች ሕገ መንግሥታዊ መብታቸው ተጥሶ ከሆነ፣ የድርጊቱ ሕገወጥነት መረጋገጥ የነበረበት በሕግና በፍትሕ እንጂ በባለሥልጣናት ውሳኔና ትዕዛዝ መሆን እንደሌለበት አስታውቋል፡፡ በአካባቢው የመንግሥት ኃላፊዎች በአሰፋፈር ምክንያት የተፈጠረ ችግር የነበረ ከሆነም፣ አስቀድሞ በመከላከል ማስቆም ይገባው እንደነበር ኢዴፓ ለማስገንዘብ ሞክሯል፡፡

የአንድ አካባቢ ሰዎች ወደ ሌላ አካባቢ ተንቀሳቅሰው መስፈራቸውና መኖራቸው የረጅሙ የኢትዮጵያ ታሪክ አካል መሆኑን የጠቆመው ኢዴፓ፣ ይኼ የሚያሳየው በሕዝቦች መካከል ያለውን ትስስር በማጠናከር፣ ለአገር ግንባታ በጎ አስተዋጽኦ ሲያበረክት የቆየ መሆኑንና በአንድ ጠባብ ጂኦግራፊያዊ ክልል የሚኖሩ ማኅበረሰቦች በሰፊው የአገሪቱ ክልል እንደልባቸው ተንቀሳቅሰው፣ ሠርተው በመኖር ራሳቸውን የአንድ ትልቅ አገር ባለቤት ያደረጉበትን ዕድል እንደፈጠረላቸው አብራርቷል፡፡

ኢዴፓ በራሱ ተንቀሳቅሶ ባላጣራው ነገር ላይ የአቋም መግለጫ ማውጣቱ ለምን እንዳስፈለገ የጠየቅናቸው ዋና ጸሐፊው አቶ መስፍን መንግሥቱ፣ ‹‹እኛ በራሳችን መንገድ ሄደን ማጣራት አልቻልንም፤ ከሦስተኛ ወገን መስማት አስፈላጊ ሲሆንና የተገኘው መረጃ ትክክለኛ ነው ብሎ ሲያምን ኢዴፓ አቋም ይወስዳል፤ መግለጫም ያወጣል፤ እኔ የግድ ካላጣራሁ አይልም፤›› ብለዋል፡፡

ዘግይተው የአቋም መግለጫ ስለማውጣታቸውም አቶ መስፍን ሲናገሩ፣ የመገናኛ ብዙኃኑ ያሰራጩትን ዘገባ ተከትሎ፣ መንግሥት የሚያስተባብልበትን ሁኔታ ሲጠባበቁ እንደነበርና በኋላም የክልሉ ርዕሰ መስተዳድር ማስተባበያ በመስጠታቸው፣ ከሁለቱ ወገኖች በተገኘው መረጃ መሠረት የአቋም መግለጫውን ማውጣታቸውን ተናግረዋል፡፡

Share