Logo

ሰማያዊ ፓርቲ ሰላማዊ ሠልፍ ጠራ (ሪፖርተር)

June 2, 2013

ሪፖርተር – ሰማያዊ ፓርቲ እሑድ ግንቦት 25 ቀን 2005 ዓ.ም. ታላቅ ሰላማዊ ሠልፍ መጥራቱን አስታወቀ፡፡ ግንፍሌ አካባቢ ከሚገኘው የሰማያዊ ፓርቲ ጽሕፈት ቤት በአራት ኪሎ፣ በፒያሳና በቸርችል ጎዳና አድርጎ ዋናው ፖስታ ቤት ፊት ለፊት የሚገኘው የኢትዮጵያ ኩባ አደባባይ መዳረሻው የሚሆነው ሰላማዊ ሠልፍ፣ ከጧቱ አራት እስከ ስምንት ሰዓት እንደሚከናወን ፓርቲው አስታውቋል፡፡

ሰማያዊ ፓርቲ እንደሚለው የአስተሳሰብ፣ የዕምነት፣ የዜጎች በየትኛውም የአገሪቱ ክፍል ተዘዋውሮ የመኖርና የመሥራት መብት በተከበረባት ኢትዮጵያ፣ የመንግሥት አስተዳደር ፍትሐዊና ዲሞክራሲያዊ እንዲሆን የሚታገል አገር አቀፍ ፓርቲ ነው፡፡

“ፓርቲያችን በአገራችን እየተከሰቱ ያሉትን የመብት ጥሰቶች መንግሥት እንዲያስተካክል በተደጋጋሚ ቢጠይቅም መልስ ባለማግኘቱ ጥያቄያችንን ከፍ ባለ ደረጃ ለማሰማት ተዘጋጅተናል፤” በማለት ሰላማዊ ሠልፉን ማዘጋጀቱን ገልጿል፡፡

በዚህ መሠረት ለፍትሕና ለዲሞክራሲያዊ ሥርዓት መስፈን የሚታገሉ ጋዜጠኞችን፣ የተቃዋሚ ፖለቲካ ፓርቲ መሪዎችንና አባላትን በሽብርተኝነት ስም ማሰርና ማሰቃየት ሕገወጥነት ስለሆነ ድርጊቱ እንዲቆምና የታሰሩትም በአስቸኳይ እንዲፈቱ ፓርቲው ጠይቋል፡፡

የዜጎችን ሰብዓዊ መብትና ሕገ መንግሥታዊ መብት በመጣስ ለዘመናት ከኖሩበት ቦታ ኢሰብዓዊ በሆነ ድርጊት እንዲፈናቀሉ የተደረጉ ዜጎች ወደቦታቸው እንዲመለሱና ለወደመው ንብረታቸው ተገቢው ካሳ እንዲከፈላቸው፣ ይህንን ሕገወጥ ድርጊት የፈጸሙ ባለሥልጣናትም ለፍርድ እንዲቀርቡ ጥያቄ አቅርቧል፡፡

“መንግሥት በሃይማኖት ጣልቃ አይግባ፡፡ የሃይማኖት መሪዎችን መምረጥና የዕምነት ሥርዓታችንን ሃይማኖታችንን በሚፈቅደው ብቻ እናከናውን ያሉ የእስልምና ሃይማኖት ተከታዮችንና ተወካዮችን በአሸባሪነት ወንጀል በመክሰስ በእስር እንዲማቅቁ መደረጉ እንዲቆምና በአስቸኳይ እንዲፈቱ፤” በማለት ጥሪ አድርጓል፡፡ መንግሥት የኑሮ ውድነትን፣ ሥራ አጥነትንና በከፍተኛ ደረጃ የተንሰራፋውን ሙስና እንዲያስተካክል ጠይቆ፣ “በዚህ ታላቅ ሰላማዊ ሠልፍ ተሳታፊ በመሆን የዜግነት ድርሻዎን እንዲወጡ ተጠርተዋል፤” በማለት ዜጎች በሰላማዊ ሠልፉ እንዲሳተፉ ፓርቲው ጠይቋል፡፡

Share