Logo

የህዳሴ ግድብ የዋናው ግድብ የአርማታ ሙሌት ሥራ ተጀመረ

November 27, 2013

አዲስ አበባ፣ ህዳር 17፣ 2006 (ኤፍ.ቢ.ሲ) ታላቁ የኢትዮጵያ ህዳሴ ኤሌክትሪክ ኃይል ማመንጫ ግድብ ግንባታ መጋቢት 24 ቀን 2003 ዓ.ም ይፋ ከሆነበት ጊዜ ጀምሮ እስከ አሁን ድረስ የተለያዩ ሥራዎች ተከናውነዋል፡፡

በሥራው ሂደት በርካታ የግንባታ ምዕራፎችንም አልፏል፤ የፕሮጀክቱ ዋንኛ አካላት የሆኑት የግድቡ የኃይል ማመንጫ ጣቢያዎችና የኃይል መቆጣጠሪያ ማዕከል ሥራዎችም በመቀላጠፍ ላይ ናቸው፡፡

በፕሮጀክቱ ዲዛይን መሰረት ሲከናወኑ የነበሩት የተለያዩ የቁፋሮ ሥራዎች በመገባደድ ላይ ሲሆኑ፥ በአሁኑ ወቅት የዋናው ግድብ ግንባታ ወደ አዲስ ምዕራፍ እየተሸጋገረ እንደሆነ የፕሮጀክቱ ዋና ሥራ አስኪያጅ ኢንጅነር ሥመኘው በቀለ ተናግረዋል፡፡

ኢንጅነር ሥመኘው እንደሚሉት፥ አሁን በአብዛኛው የቁፋሮ ስራው እየተጠናቀቀ የአርማታ ሙሌት ሥራው ቀጥሏል፡፡ የሃይል ማመንጫ ጣቢያዎች ግንባታ ለማከናወንም የወለል ቁፋሮ እየተጠናቀቀ ነው ብለዋል፡፡

ከዝቅተኛው ወለል የተጀመረው ይህ የአርማታ ሙሌት ሥራ 1 ሺህ 7 መቶ 80  ሜትር ርዝመትና 1 መቶ 45 ሜትር ቁመት ያለው ግድብ ግንባታው እስኪጠናቀቅ ድረስ ይቀጥላል፡፡

የግድቡ ግንባታ እስኪያልቅ ድረስ ወንዙ በቋሚነት የሚፈስበትን የብረት አሸንዳ ለመትከልም የመሰረት ግንባታው በመጠናቀቅ ላይ ነው፡፡ ለዚህ ተግባር አስፈላጊ የሆኑ የግንባታ ሥራዎችም በመፋጠን ላይ ናቸው፡፡

የብረታ ብረትና ኢንጅነሪንግ ኮርፖሬሽን ወንዙን ለመጥለፍ የሚያስችሉ መሳሪያዎች በማምረት ላይ ሲሆን ከጥቂት ቀናቶች በኋላ የተከላ ሥራውን እንደሚጀምር ነው የተገለጸው፡፡

በሁሉም የግንባታ ሥራዎች ዓለም አቀፍ ደረጃውን የጠበቀ የጥራት ፍተሻ እንደሚከናወን የገለጹት ኢንጅነር ስመኘው ፣ፕሮጀክቱን በተያዘለት የጊዜ ገደብ ለማጠናቀቅም 24 ሰዓት እየተሰራ እንደሆነ ገልጸዋል፡፡

በዚህ ፕሮጀክት ያሉት የሲቪልና የሃይድሮ መካኒካል ሥራዎችም በከፍተኛ ቅንጅት እየተከናወኑ ነው፡፡ ለግንባታው መቀላጠፍ አስፈላጊ የሆኑ 1 ሺህ 600 ማሽኖችን ጨምሮ ሁሉም ግብዓቶችና ቁሳቁሶች እንደተሟሉም መግለፃቸውን የዘገበው የኢሬቴድ ነው፡፡

– Fana

Share